Rekte al la artikolo

Bill Auld: donacemo celebrata

<<  [953]  >>

David W. Bisset

Bildo

Unu el la plej valoraj donacoj de la pasintaj kvin jaroj: tiel taksis la Nacia Biblioteko de Skotlando la libraron de Bill Auld, kiuj transdonis siajn Esperanto-librojn al la biblioteko en Edinburgo. Donaco vere valora, ĉar la kriterioj por akcepti t.n. specialajn kolektojn ĉe la nacia biblioteko altegas.

Dum ceremonio fine de 2001 la bibliotekestro, Ian McGowan, pritraktis la nekredeblan variecon de la verkistaj roloj de Bill Auld: poeto, redaktoro, novelisto, verkisto kaj tradukisto. Li gratulis lin pri la kandidatiĝo por la Nobel-premio pri literaturo: neniu skota verkisto antaŭe ricevis tiun honoron. Tial la biblioteko ekscitiĝis, kiam Auld kontaktis ĝin pri ebla donaco de la propra libraro.

S-ro McGowan invitis al la donacinto respondi. Regis plena silento, dum Auld pasis al la podio. Li rigardadis la homojn, ridetis, eldiris spritaĵon por malstreĉi la aŭskultantaron, kaj komencis paroli simple kaj el la koro:

Bildo

'Mi fieras pri mia honorigo; sed mi estas ankaŭ humiligata, ĉar miaj libroj kaj verkoj nun troviĝas por ĉiam kune kun la verkoj kaj kolektoj de la gigantoj de skota literaturo. Kia honorego!' Li paŭzis denove. 'Ĉu sufiĉas? Jes: sufiĉas.' Tondris la aplaŭdo, dum li reiris al la sidloko.

La nacia biblioteko nun katalogas la Auld-kolekton kaj preparas ĝin interrete disponigi. Espereble eblos jarfine iri Edinburgon por legi la librojn. La biblioteko bonvenigas tagvizitantojn: membriĝo haveblas por tiuj, kiuj interesiĝas pri la speciala kolekto.

David W. Bisset estas vic-prezidanto de Esperanto-Asocio de Britio kun aparta respondeco pri publico. Li estas ankaŭ sekretario de Esperanto-Asocio de Skotlando kaj kunorganizas i.a. la skotan studrondon en Dunblane.

Ĉi tiu artikolo aperis en La Brita Esperantisto de aŭtuno 2002.

<<  [953]  >>