La Brita Esperantisto

revuo de EAB

• Indekso
• Hazarda paĝo
• 2018
• 2017
• 2016
• 2015
• 2014
  • aŭtuno
    • Fronta kovrilo
    • Redaktore
    • Nova federacia kunvenejo
    • 'Londrondo' – foresto neakceptebla!
    • Lastatempa alveno en Esperantujo
    • Rondo familia ĉe la Cirklo
    • Sin venĝas la krokodilo
    • Pri keltoj kaj kiltoj
    • Recenzoj
    • La heroino de Liverpolo
    • Marjorie Boulton: 90-jaraĝa
    • Malsubkatiĝo
    • Esperanto kaj la unua mondomilito
    • Shallowford printempe… kaj somere
    • Malavara, gastama: Audrey Duerden (1929–2014)
    • Babile
    • Ĉe Esperanto Place
  • printempo
• 2013
• 2012
• 2011
• 2010
• 2009
• 2008
• 2007
• 2006
• 2005
• 2004
• 2003
• 2002
• 2001
• 2000
• 1999
• 1998
• 1997

Marjorie Boulton: 90-jaraĝa

Ĉe la oksforda kolegio, kie ŝi komencis studi en la jaro 1940, festis Marjorie Boulton kun esperantistoj, kolegianoj kaj amikoj sian 90-an naskiĝdatrevenon.

Ĉe la oksforda kolegio, kie ŝi komencis studi en la jaro 1940, festis Marjorie Boulton kun esperantistoj, kolegianoj kaj amikoj sian 90-an naskiĝdatrevenon.

Glate organizis la feston, okazintan la 22-an de majo, d-ro Geoffrey Greatrex, prezidinto de Esperanto-Asocio de Britio, kunlabore kun EAB kaj kun kolegio Somerville, kiu ne nur disponigis ĉambraron ĉe konferencejo Thatcher sed aranĝis bongustajn bufedon kaj festkukon.

Ĉeestis ne nur britaj esperantistoj sed ankaŭ Brian Moon el Luksemburgio, vicprezidanto de la Akademio de Esperanto, kiu salutis nome de la akademio; Anna Löwenstein el Italujo; kaj Franĉjo Veuthey el Nederlando, kiu filmis la eventon por UEA.

La nuna EAB-prezidanto Paul Gubbins bonvenigis ĉeestantojn kaj skizis, anglalingve, la atingaĵojn de Majorie. Li parolis pri ŝiaj 17 volumoj verkitaj en la angla, inkluzive de tekstoj en la Anatomy-serio, ekzemple Anatomy of Poetry kaj Anatomy of Drama. Tiuj ĉi libroj, ekverkitaj en la fruaj 1950-aj jaroj, ankoraŭ rekomendatas en universitataj legaĵo-listoj. Kelkaj estos eĉ reeldonitaj de Routledge.

D-ro Gubbins plue atentigis pri la esperanta verkaro de Marjorie. Voĉleginte anglan tradukon de la poemo 'Riĉo', li diris, ke ŝi verkas ne por aliaj poetoj sed alparolas en siaj versaĵoj ordinarajn homojn.

Pro tio, li diris, ŝi estas ne nur la plej eminenta vivanta esperantisto sed ankaŭ la plej amata – ne nur pro siaj poemoj kaj dramoj sed ankaŭ pro sia vasta, tutmonda korespondado, per kiu ŝi tuŝas kaj kaptas la korojn de centoj da esperantistoj en ĉiuj mondopartoj.

Sekvis filmitaj salutmesaĝoj interalie de iama UEA-prezidanto Humphrey Tonkin, la prezidanto de la Akademio de Esperanto Christer Kiselman, Simon Davies kaj Stevens Norvell.

Poste, dialogante kun Geoffrey Greatrex, Marjorie babilis pri siaj studentaj jaroj ĉe Somerville (la manĝaĵo aĉis, sed al la kolegio ŝi ŝuldas sian mensan liberiĝon kaj kreemon), sia amikeco kun Iris Murdoch, kaj pri katoj. Voĉlegita – de Geoffrey Greatrex – esperante kaj angle estis ankaŭ la poemo 'Aliĝilo'.

Videblis ekspozicioj ne nur pri libroj de Marjorie haveblaj en la kolegia biblioteko sed ankaŭ fotoj kaj aliaj raportoj pri ŝia profesia kaj esperanta vivo.

Entute grava, memorinda kaj kortuŝa ceremonio por la plej eminenta, plej amata esperantisto en la mondo – fakto substrekata kelkajn semajnojn poste dum la Universala Kongreso en Bonaero, kiam fondaĵo Grabowski atribuis al ŝi premion 'kiel rekonon pro [ŝ]ia tuta vivoverko, kiu inkluzivas multajn pintajn verkojn de la Esperanto-literaturo.'

Fondaĵo Grabowski estas kreita antaŭ 30 jaroj per donaco de la pola-venezuela esperantisto Adamo Goralski por subteni Esperantan kulturon, precipe por originala kaj tradukita beletro.