Printempa Renkontiĝo en Aberdeno, 2014

La printempa JEB-renkontiĝo 2014 okazos en Aberdeen, Skotlando, de la 21a ĝis la 23a de marto. Partoprenis la plejparto de la komitato de JEB, kaj ankaŭ londonaj kaj aberdenaj Esperantistoj.

Post longega busvojaĝo (12 horoj en Megabus - neniam plu!) mi alvenis laca kaj antaŭĝoja en Aberdeno. Estinte nur antaŭe en Edinburgo en Skotlando, mi scivolemis pri la ĉemara urbo. Vendredvespere (la 21a) alvenis la plejparto de la partoprenantoj. Origine ni planis ĉeesti tradician skotan dancon, Ceilidh (‘kejli’), sed ni ne sukcesis ĉiuj aĉeti biletojn ĝustatempte. Fine ni jam decidis, ke ni estas tro lacaj por danci, do des pli oportune!

Marischal College nokte - unu el la plej famaj konstruaĵoj en Aberdeen

Post bela babilado kaj ripozado, ni la postan tagon iris por ludi futbalmaĉon. En la universitato de Aberdeen estas societo de filozofiaj studentoj, kiuj ludas futbalon kontraŭ aliaj societoj. Bedaŭrinde estis aĉa vetero, kaj iom pli aĉe malvenkis Esperantujo.

Alex Jarvis kun samteamano Nicolas Raymond

Poste ni iris urbumi, kaj ni multe profitis de la agrabliĝinta vetero por ankaŭ vidi belajn panoramojn.

Ni vizitis diversajn kvartalojn de la urbo, inkluzite Fittie, la tradicia fiŝkaptista vilaĝo surbaze de kiu kreskis la riĉeco de Aberdeno.

Ĉarma tradicieca drinkejo en Fittie

En Aberdeen ankaŭ eblas vidi belegan maron

Poste ni iomete pli urbumis kaj kelkaj iris al kluba vespero ‘Psychedelicious’ por sperti pli modernan aspekton de Aberdena kulturo. Dimanĉe mi kaj Alex faris prelegon en la universitato kiel enkondukon al Esperanto, parolante pri ĝiaj lingvistikaj kaj kulturaj aspektoj.

Ŝajne Alex pli kaj pli sukcesas kun liaj streboj disvastigi Esperanton en Aberdeno, kaj la nombro de interesiĝantoj kiuj ĉeestas la klubon tie pli grandiĝas. Ni dankas al li pro liaj kuraĝigaj klopodoj.

Do, fine estis tre bona renkontiĝo, malgraŭ foje atakema vetero, kaj mi jam antaŭĝojas la venontan fojon.