News

Nia eldon-ritmo ne permesas al ni afiŝi tre ofte pri agado. Viaflanke, reviziti malofte ĝisdatigatan retejon por kontroli, ĉu hazarde aperis io nova estas nekredeble tede. Sed samtempe, vi volas informiĝi pri novaj libroj, ebloj antaŭmendi, ktp. Kion fari, do?

La solvo estas treege simpla: permesi al la novaĵoj atingi vin! Temas pri sekvado, koncepto, kiun vi eble konas de sociaj retejoj. Vi simple per alklako indikas, ke vi volas sekvi iun temon; t.e. ricevi novaĵojn. Tiuj povas esti per sciigoj en la retejo, kiuj montras sin al uzanto ensalutinta:

aŭ per retpoŝtaĵoj. Kion ajn vi preferas, necesas krei konton por sekvi parton de la retejo.

Ensalutinte en vian konton, iru al la kategorio pri nia eldon-agado. Sub la listo de diversaj novaĵ-kategorioj, vi vidos butonon Sekvi. Alklaku ĝin (sur la vorton; la cifero faros nenion), kaj aperos ŝprucfenestro:

Ĉar la plej multaj ne estos oftaj vizitantoj al la retejo, la unua maniero (ricevi informojn per sciigo) ne estus utila. Sufiĉas la dua eblo: en tago, kiam almenaŭ unu novaĵo estas afiŝita, ricevi retpoŝtaĵon pri ĝi. Alklaku Sekvi, kaj vi poste ricevos informojn laŭ la petita maniero. Facilege!

(Kiam vi sekvas kategorion, la vorto Sekvi ŝanĝos al Sekvate. Vi povos alklaki ĝin por ŝanĝi la agordojn, aŭ eĉ por ĉesigi la sekvadon; aperos butono Malsekvi sube de la ŝprucfenestro.) 

Se vi loĝas en Britujo

Plurajn el niaj libroj vi trovos ĉe Amazono kaj aliaj retbutikoj, ekzemple Foyles. Ĉar tiuj libroj estas malmultekostaj kaj la vendistoj ofte ofertas senpagan afrankon, tiuj ĉi libroj ĝenerale ne troviĝas en nia propra oferto.

Kiam libro ne estas tre baza, ĉar ĝi, ekzemple, uzas dikan paperon, havas nekutimajn dimensiojn, enhavas plenkolorajn bildojn, ni devis amase presigi kaj stoki, kaj tiujn vi trovos (apud libroj ne eldonitaj de ni) en nia retbutiko.

Se vi loĝas ekster Britujo

Kiel ĉe ni, multaj el niaj libroj troviĝas ĉe kutimaj retbutikoj kiel Amazono kaj aliaj. 

Niajn aliajn librojn vi trovos ĉe diversaj Esperantaj retbutikoj, ekzemple:

• Librejo Esperanta | Usono 
• Universala Esperanto-Asocio
• Espero | Slovakujo
• Flandra Esperanto-Ligo | Belgujo
• Esperanto-Bücher | Germanujo
• Espéranto-France

Ne vere indas por vi uzi nian retbutikon, pro la risko de dogan-impostoj. (Ili ne atingas ĉiujn, sed estas hazardaj malagrablaĵoj.)

En preskau ĉiu numero de La Brita Esperantisto inter 1991 kaj 1999 troviĝis anglalingva teksteto kun invito ĝin esperantigi. Tradukemaj legantoj sendis al William Auld siajn solvojn, kaj en la tuj posta numero la redaktoro prikomentis apartajn vortojn kaj esprimojn, aljuĝis premi­etojn kaj aperigis elektitan tradukon. Esperanto-Asocio de Britio reaperigis ĉiujn 56 tekstojn libroforme jam en du antaŭaj eldonoj.

Jen, en brilaj novaj vestaĵoj, la tria eldono! Kiel la aliaj ĝi enhavas la tekstojn, kiuj aperis en la rubriko, kun la komentoj de William Auld kaj la elektitaj tradukoj, plus indekson.

Ni ankaŭ aldonis tradukvortareton jam proponitan de Auld en la paĝoj de La Brita Esperantisto. Temas pri elegantaj solvoj al tiklaj anglaĵoj.

La traduktaskoj, siatempe ellaboritaj perpoŝte, intence ne estas baznivelaj, en la celo plibonigi al pli vasta publiko sian lingvokapablon: oni lernas ne nur klopodante traduki en la unua parto de la libro, sed ĉefe per la provoj de la antaŭa studrondo, la komentoj de Auld, kaj la bildiga traduko, kiun li finfine kunkudris, kiuj troviĝas en la dua parto. 

Tiu tria eldono de Traduku! troviĝas ĉe retbutikoj kiel Amazono. La rekomendata prezo estas nur £10, kontraŭ 254 paĝoj da materialo por pliakrigi siajn kapablojn!

Kadre de nia projekto Festjaro BAULDTON, EAB kun fiero anoncas la reeldonon de klasika libro de la angla literaturo, en traduko de William Auld: jen La Ĉashundo de la Baskerviloj!

La libron originale eldonis niaj kolegoj ĉe Sezonoj, en du eldonoj de 1998 kaj 2020, redaktitan de Aleksander Korĵenkov kaj korektitan de Halina Gorecka. Surbaze de ilia teksto Simon Davies lingve kontrolis kaj poluris, kaj aldonis 14-paĝan apendicon pri lingvaĵoj. Fascine! 

Post la morto de kavaliro Karlo Baskervilo apud la piedsignoj de giganta ĉashundo, oni ekflustras pri familia malbeno. La detektivo Ŝerloko Holmso kaj lia fidela helpanto doktoro Vatsono klopodas por solvi la misteron de tiu supernatura besto, antaŭ ol ĝi mortigos ankaŭ la kavaliran heredinton.

La ĉashundo de la Baskerviloj, klasika krimromano de Arthur Conan Doyle, estas unu el la plej famaj rakontoj iam ajn verkitaj. La esperantigo de William Auld unue aperis en 1998 kaj nun reeldoniĝas en la Festjaro BAULDTON.

Vian ekzempleron trovu ĉe Amazono kaj aliaj tiaj retbutikoj. La rekomendata prezo estas nur £10!

En Zamenhof-tago EAB lanĉas La edzino de l' tempvojaĝanto, tradukon de The Time Traveler's Wife, kiun aŭtoris Audrey Niffenegger. Plurfoje filmigita kaj tradukita en dudekon da lingvoj, la furora romano nun ricevis Esperantan veston el la manoj de István Ertl.

Jen unu el la plej malkutimaj amhistorioj en la monda literaturo. Clare kaj Henry renkontas sin la unuan fojon kiam ŝi aĝas ses kaj li – tridek ses. Ĉe la geedziĝo, ŝi tamen estas dudek du jarojn aĝa, dum li – tridek. Tio eblas nur ĉar Henry moviĝas en la tempo malsame ol ni ĉiuj. Tempvojaĝado ne faciligas amrilaton, milde dirite. Dum ni leg-akompanas la vivon de paro kiu defias «krono-sindromon», ni ekpensas pri la ekstertempeco de tio kio plej fortas en la vivo de la specio homo: amo.

Tiun ĉi 656 paĝojn longan perlon trovu ĉe Amazono kaj aliaj tiaj retbutikoj!
 

Morgaŭ alvenos decembro: jen do perfekta tago por fini nian sep-voluman Muminserion per Malfrue novembre, tradukita de Sten Johansson.

Estas aŭtuno en Muminvalo. Por tiuj, kiuj alvenas tien, ĉio aspektas alia, ne tute kiel ili atendis. Kaj la Muminfamilio ŝajne ne estas hejme. La gastoj, kiuj kolektiĝas en la malplena Mumindomo, devas klopodi por laŭkapable loĝi kaj vivi unu kun la alia. Ili estas Filifjonkino kaj la Hemulo, Mimlino, Onkloskruto kaj la eta homso Toft. De fore ankaŭ Snufmumriko revenas en la valon, kie li perdis ion gravegan. En la ĝardeno kuŝas la blua vitroglobo sur sia kolono, spegulante grandajn ŝanĝojn, dum la novembra mallumo densiĝas ĉirkaŭ la ses gastoj.

Antaŭe aperis Kometo en Muminvalo, Ĉapelo de sorĉisto, Memoroj de Muminpatro, Somermeza dramo, Vintro en Muminvalo kaj La patro kaj la maro. La rekomendata prezo estas £10, kaj la libro estas aĉetebla ĉe kutimaj libroservoj, inkluzive de Amazon, Barnes and Noble (en Usono), kaj aliaj tiaj grandaj retbutikoj.

Hodiaŭ estas Haloveno, kaj ni lanĉas novan Muminlibron, en kiu kompatinda Mumintrolo spertas aferojn timigajn. Jen la 6-a en nia serio: La patro kaj la maro!

Muminpatro sentas sin nebezonata. En la varmegaj tagoj fine de aŭgusto li revas pri aventuro. Li volas protekti sian familion, kvankam ĝi elturniĝas sufiĉe bone eĉ sen tio.

Plej fore en la maro situas insuleto kun lumturo. Tien la patro velas kun sia familio kaj Eta Mim. La insulo estas sovaĝa kaj dezerta, tute ne kiel la hejma valo. Mumintrolo atendis ion novan kaj ekscitan, kaj sur la insulo li spertas aferojn timigajn, misterajn kaj defiajn, sed ankaŭ belajn kaj mirindajn. Muminpatro ne ĉiam komprenas la maron tiel bone, kiel li supozis, kaj Muminpatrino sopiras la malnovan hejmon. Nur Eta Mim ĉiam elturniĝas, kio ajn okazas. Sed kien do malaperis la lumtura gardisto?

Antaŭe aperis Kometo en Muminvalo, Ĉapelo de sorĉisto, Memoroj de Muminpatro, Somermeza dramo, kaj Vintro en Muminvalo. La rekomendata prezo estas £10, kaj la libro estas aĉetebla ĉe kutimaj libroservoj, inkluzive de Amazon, Barnes and Noble (en Usono), kaj aliaj tiaj grandaj retbutikoj.

Hodiaŭ estas Esperanto-Tago, kaj ĝin ni festas per nova Muminlibro! Jen la 5-a en nia serio: Vintro en Muminvalo!

Unu tagon en januaro Mumintrolo vekiĝas el sia vintrodormo kaj ne povas reendormiĝi. Unuafoje li spertas la vintron kun neĝo kaj malvarmo. Li estas tre soleca, ĉar ĉiuj familianoj plu dormas, kaj komence la vintro timigas lin. Sed poste vekiĝas ankaŭ lia malnova amikino Eta Mim, kiu neniam timas, kaj iom post iom li renkontas novajn estaĵojn. Aperas Tu-tiki kaj ŝiaj nevideblaj sorikoj, la bruema Hemulo, la hundeto Jelp, kiu revas pri la sovaĝaj lupoj, kaj multaj aliaj. Do, lia Muminvalo baldaŭ plenas de nekonataj gastoj, kun kiuj li spertas aventurojn, kaj finfine li rimarkas ke eblas ŝati ankaŭ la vintron. Ĉar, kiel diras lia nova konato Tu-tiki: Ĉio estas tre malcerta, kaj ĝuste tio trankviligas min.

Antaŭe aperis Kometo en Muminvalo,Ĉapelo de sorĉisto, Memoroj de Muminpatro, kaj Somermeza dramo. La rekomendata prezo estas £10, kaj la libro estas aĉetebla ĉe kutimaj libroservoj, inkluzive de Amazon, Barnes and Noble (en Usono), kaj aliaj tiaj grandaj retbutikoj.

La 24-a de junio, la tago de Sankta Johano, estas la tradicia somermeza festo en Finnlando kaj Svedujo, kaj tial montriĝas la perfekta tago lanĉi la kvaran libron en nia Muminserio! Tove Jansson ja pensis pri tiu festo («juhannus» en la finna), kiam ŝi verkis Somermeza dramo.

La akvo simple altiĝas, altiĝadas, kaj ĉio ekflosas.

Jen aperas drivanta teatro, kaj per tiu la Muminfamilio drivas en somermezan nokton plenan de sorĉo kaj surprizo, kun novaj amikoj kaj malamikoj.

Ĉi tio estas la rakonto pri tio, kio okazis dum la magia monato junio en tiu jaro, kiam la fajrosputa monto ekmoviĝis, kaj la patrino de Mumintrolo faris sian plej belan arboŝelan ŝipeton.

Antaŭe aperis Kometo en Muminvalo, Ĉapelo de sorĉisto kaj Memoroj de Muminpatro. La rekomendata prezo estas £10, kaj la libro estas aĉetebla ĉe kutimaj libroservoj, inkluzive de Amazon, Barnes and Noble (en Usono), kaj aliaj tiaj grandaj retbutikoj. 

«Pli ol ĉiu ajn alia verko Esperanta, ĝi meritus reeldonon.» Tiel verkis literaturisto Sten Johansson pri La granda kaldrono, siatempe la plej longa originalaĵon de la originala literaturo de Esperanto. Precize cent jarojn post la naskiĝo de ĝia verkinto, John Francis, EAB ja re-eldonis ĝin!

Laŭ la deziro iam esprimita de William Auld, la originala libro disvendiĝis, kaj dum jardekoj ne estis disponebla, ĝis niaj kolegoj en Esperanto-Asocio de Skotlando eldonis ĝin elektronike en 2017.

Du mondmilitoj – du generacioj de unu skota familio.
Luktado ĉe la fronto – kaj luktado ankaŭ hejme. 

La granda kaldrono, la majstroverko de John Francis kaj unu el la plej gravaj romanoj en Esperanto, sekvas la vivojn de kelkaj ordinaraj homoj tra la tempo de du mondmilitoj, esploras iliajn diversajn sintenojn al la milito, bildigas la militservajn spertojn de kelkaj el ili, kaj montras la ŝanĝojn en ilia socio kaj la dilemojn de la ĉiutaga vivo.

Tiu nova eldono, kiun editoris Edmund Grimley Evans, ampleksas 626 paĝojn! Ĝin eblas aĉeti ĉe retbutikoj kiel Amazono. La rekomendata vendoprezo estas £15.

MATILDA estas brila infano kun MAGIA menso.

Tamen ŝiaj gepatroj opinias ŝin malŝparo de spaco.

Kaj ŝia lernejestrino Fraŭlino TRUNCHULL estas malica tirano, kiu opinias, ke ĉiuj infanoj estas putraj kaj aĉaj kaj estu enŝlositaj.

Alvenis la tempo, kiam Matilda devas trovi la forton por ŝanĝi sian rakonton, kaj montri, ke infanoj povas esti eksterordinaraj . . . 

Verkitan de Roald Dahl kun ilustraĵoj de Quentin Blake, tiun ĉi klasikaĵon tradukis Tobiasz Kubisiowski, kiu gajnis traduk-konkurson starigitan de EAB. Ĝin poluris Simon Davies.

Ĝi estas disponebla ĉe Amazono kaj aliaj tiaj retbutikoj, kun rekomendata prezo £10.

Nove re-eldonita kiel la unua parto de nia Festjaro BAULDTON: Rimleteroj, kuna projekto de la festatoj dum ilia frua esperantisteco!

En 1953 William Auld invitis Marjorie Boulton korespondi uzante rondelojn, poem-stilon de mezepoka Francujo. Ŝi tuj akceptis la duelinviton.

Dum periodo naŭ-monata la duopo inter­ŝanĝis 84 poŝt­kartojn verkitajn laŭ tiu stilo, montrante sian junaĝan vervon kaj vivlongan spriton. La tekstoj konserviĝis, kaj nun vi, kara leganto, povas konatiĝi kun tiu sendube unika fenomeno, reeldonita omaĝe al tiuj elstaraj esperantistoj precize cent jarojn post ilia naskiĝo.

Troviĝas en la libro ne nur la 84 rondeloj, sed ankaŭ biografietoj de William Auld kaj Marjorie Boulton, po unu tiuepoka foto de ambaŭ, kaj antaŭparolo kaj postparolo verkitaj de Tim Owen. La internajn flankojn de la kovrilo ornamas plenkoloraj fotoj de kelkaj el la originalaj poŝtkartoj.

Trovu tiun elstare belan novan eldonon de Rimleteroj ĉe kutimaj retbutikoj kiel Amazon! Ni lanĉas kontraŭ nur £10!